Inpumkhatna - Koinonia Editorial September 23

Johana 17 kan chhiar chuan Lal Isua’n pumkhata kan awmna tur a, atawngtaina kan hmu a. Rom 12:5 ah, “Kristaah chuan taksa pumkhat kan ni a; a mal malin inpeng tawn theuh kan ni” a ti a. Bible ah hian inpumkhatna thu tam tak kan hmu a, ringtute hi inpumkhata awm tur hian Lal Isua’n min duh hle. Chumi tih puitlin chu ringtute tih mak mawh a ni. Ringtute pumkhata kan awm hi sualin a huat ber pakhat ti ila kan sawi sual awm love, Korinth khua a Tirhkoh Paula lehkhathawn ah pawh kan hmu a, Krista kan aia khenbeh a awm kha entlat ila chumiah chuan Pathian ah pumkhatin kan awm thei dawn a ni. Ringtute inkarah kohhran thurin hrang avanga indaidanna a awm thin a, Pathian ringtu inti siin rawng inbawltawn kan harsat em em mai a, kan thlenkhawmna tur chatuan hmun ngaihtuah siin, chatuan hmun kan thlenkhawm theihna tur Kristaah erawh pumkhata awm kan harsat lawi si anih hi! Kohhran hrang hrang ten pawl ram tih len tumna avangin ringtute kan inchuh ani ber a. Kan chhehvela cheng ringlo mite hian Kristian te hi min han hre chiang sela chuan engtin tak min ngai ang maw? Kohhran pakhat a dinna hmuna kohhran dang dinchu Pathian ram zauna ah kan ngaita em ni aw tih tur a ni. Chanchintha hrilna tur tam tak a awm laiin, pawlah kan buai fo thin hi Pathian duhloh zawng tak atlingin a rinawm.

BMCF ah kohhran hrang hrang kan lawi khawm a, kan thupui ber chu inpumkhatna hi a ni, kan punkhawm chhan chu Pathian a ni. Hei hi a Pathian thu hle bawk. Zoram ah ngei pawh, hetiang hian ringtuten rawng inbawl sak tawn thei ila, tunai hian kan rawngbawlna huang pawh a zauin, Pathian ram tak kan thlen thei ngei ang. Kohhran pakhatin ramthimah missionary thawna rawng abawl chuan, a rawngbawlna chu nasatakin pui mai ila. Ringtu awmkhawmna hmunah pawl hrang hrang kan din a, hei hian ringtute min then darh nasa hle. Hetianga ringtute inpumkhatna tichhe thei hi BMCF member-te chuan nasa takin kan do zel tur a ni.