Ringtute Hian Midangte Lakah Tih Tur Kan Nei - Koinonia Editorial August 2024

Pathianin midangte chungah Amah ringtu kan nihna angin tih tur min pe vek a, chung zinga thenkhat chu kan rawn tarlang dawn a ni.. Pakhatnaah chuan, Rawnginbawl tawn hi Ringtuten kan tih tur a ni. Bible chuan, "mi tinin thilpek in hmuh ang zelin Pathian khawngaihna tinreng enkawltu thate angin, chung chuan rawng inbawl tawn theuh rawh u," a ti a. (1 Petera 4:10) Kan rawngbawlnaah hian mi zawng zawngin kan rinna kan lantîr hunah Pathian khawngaihna chu thiltihin an hmu ang. Rawngbawlna hi mi dangte chunga Kristian hmangaihna lantir hi a ni. Pahnihnaah chuan, Infuih tawn hi ringtuten kan tih tur a ni. Thessalonika pakhatna 5:11-ah chuan, "Chuvangin, infuih tawnin,intisâwt tawn theuh rawh u," a ti a. Hnathawh, inlaichinna leh sum leh pai avanga beidawng nih hi he khawvelah hian a awl hle. Mite chu fuihna hmang hian an tho chhuak thei a, anmahni an inrin chuan harsatna an tawh apiang an hneh thei a ni. Chuvangin, khawvel beidawng tak karah hian rinna, hnehna leh rinawm taka awm reng tura tanpui hi kan Kristian mawhphurhna a ni. Pathumnaah chuan, Midangte phurrit phurh pui hi ringtuten kan tih tur a ni. Galatia 6:2-ah chuan, "In ritphurhte inchhawk tawn rawh u, chutichuan Krista dan thu chu in zawm a ni ang," a ti. Tumah phurrit phurhna ruamah hian mahni chauha kal a theih loh a, midangte nen kan kal dun a ngai a, mi tam takin an kekawr iptea phurrit rit tak an phurh chu kan tel ve a, kan tihziaawm a ngai bawk. Isuan kan phurrit lian ber chu krawsah a la bo a. Chuvangin, keini -- Isua ang bawkin -- kan unaute ruam chhunga bo tawhte hi kan tanpui a ngai a ni. A tawp berah chuan, In tawngtai sak tawn hi kan tih tur a ni. Jakoba 5:16-ah chuan, "chutichuan tihdama in awm theih nan in sualte thupha chawi tawn ula, in tawngtaisak tawn thin rawh u” a ti a. Kan phurrit rit tak takte hi thilsiam khawvelah a awm lo mai mai a, thlarau lam thilah pawh a tel ve bawk. Kan intawngtaipui tawn tur a ni. A châng chuan kan chauh leh phurrit kan tawh hian tawngtai duhna kan nei lo mai mai thin. Chuvangin keini Kristiante hian kan unaute tan kan tawngtai a, an aiawhin kan tawngtai a ngai a ni. Tawngtaina chak leh hlawk tak chuan danglamna zawng zawng a siam ang. Kristian kan nih angin midangte chungah tih tur kan nei a. Kristian zawng zawngte hi tho chhuak a, Hriat Loh Thlan vengtu ang maia taima taka kan hnathawh tur kan hlen chhuah chuan he khawvel hi hmun danglam tak a ni ang. Chuvangin, i post la la, Pathian leh midangte rawngbawl tura tih tur ti famkim turin ala tlai lo, tiin infuih thar zel ang u.

Tunlai Bangalore ah damlohna hrang hrang avanga kan member Hospital lut leh in lama inenkawl an awm nual a. Kohhran hruaitute, Area hruaitu te leh member tlawmngaiten kan in kal kual thin hi a hlu hle a. Hei chuah nilo in, Mizo te ah chhiatna tawk an awm in, a mizo ang leh kohhran ang ten kan in leng thin. Hei hi a hlu hle a, chhiat tawk leh damlo te tan a thlamuan thlak hle thin a ni. Zoram lam pawh hmasawnna hrang hrangin min nuai a, kan kalphung ni thinte zawi zawi a thlah chhoh alo ngai ve ta zel a. Khawpui ah chuan hmun tam tak takah chuan khawhar inriak pawh kalpui ngamlo leh kalpui theih alo ni talo a. Tiang chuan, khawhar chhungte a YMA ang zawnga hnathawhsak leh tihte pawh alo awm talo a. Thlan lai tur thalaite pawh an khat phauh tawh mai a. Heng hrang hrangte hi Mizo te tlawmngaihna kan hnual suat vang nilo in, hmasawnna leiram kan rah ve vang a ni. Bangalore bik han thlir ila, chhiatna tawk kum tin an awm thin a, damlohna vanga Hospital lut leh in lama in enkawl, engemaw avanga buaipui ngai mizo kan kat ve nuk kum tin zel. Heng chhiat that tawh tum te hian, Bangalore mizo nih a nuam thin hle a. Hnathawhna leh zirna tul hrang hrang avanga kan buai em em karah chhiat thata kan insawngbawl leh in enkawl dan hi, a Mizo zia hle a ni. Hmanlai huna kan pasaltha mual liamta te kha, tunlai hunah hian lo tho leh tase, Bangalore lama thalai te tlawmngaihna lo liam hian an tlawmngai chuangin a rinawm loh. He tlawmngaihna hi BMCF pawn kohhran huangah Pathian hmangaihna anih hriain, member te leh tanpui ngaite theihtawp in kan buaipui zel a, hei hi a Pathian thu hle a. Tlawmngaihna hi anihna takah chuan, Pathian ringtute tan chuan Pathian rawng kan bawlna pawimawh tak mai, Kohhran huangah chuan “Tlawmngaihna” nilo in “Pathian hmangaihna” kan tih lanna a lo ni.

-Tv. Lalngurpuia