Kohhran hi tu ta nge? - Koinonia Editorial July 2024

Khawvel in her mek leh Kohhran kal zelna turah hian he zawhna pawimawh tak, “Kohhran hi tu ta nge?” tih hi mitinin kan chhan a pawimawh hle mai. Bangalore Mizo Christian Fellowship pawhin kum 49 hmel a lo hmu ve ta a, nakum maiah Golden Jubilee lawm turin kan inpuahchah mek a nih hi.

Kohhran dintu chu Isua Krista a ni tih leh Kohhran lu chu Krista a ni tih hi chu tumahin kan hnial awm lo ve. A dintu leh lu chu a neitu ber chu a ni phawt mai. A nih leh, keini Kohhran mi leh sa te hi a neituah kan inngai ve em? Nge a chhimtu emaw hlawhfa mai? Kohhran hi Pastor rualho ta em ni? Kohhran Upate ta em ni? Kohhran committee ta em ni? Heng zawhnate hi ngun taka ngaihtuah chunga kan chhan a va pawimawh em! A pawimawhna em em pakhat chu a neitu leh neitu nilo rilru puthmang hi a lo danglam thei em a ni. A neitu rilru put hmang chu a thahnemngaihnate, a inpeknate, a thuamthat kawngahte leh Kohhran tana hmathlir tha neih kawngahte a neitu nilo nen chuan a danglam em em a ni.

Pastorte, Upate leh Kohhran Committee memberte chuan a neitu rilru pawh an lo pu thei e, midang zawng hi a neitu ni ve chiah lo ‘member mai’ em ni an nih? Kum 50 hmel hmu mai tur BMCF Kohhrante hian ngun taka kan ngaihtuah pawimawh hle mai.

Kohhran nihnate, nihphungte, a tihturte, a kal zel dan turte chu a neitu kuta awm a ni. Vawiin ni a Kohhran awmzia, nihphung leh tihturte sawifiah chamchi thinte hi Kohhran neitu tak tak an ni em? Kan thurin pawm ve lote, kan tih anga ti ve lote, an hruaitute leh Upate kan thlan leh nemngheh ni ve lote hi Kohhran an ni ve em? Ni lo em? Tuin nge chhang dawn? Mizorama chhunga Mizoram Kohhran Hruaitu Committee te leh Mizoram Council of Churches te hmanga Kohhran inzawmkhawmna, inthurualna, thawhhona leh inlungrualna sualtute hian Mizoram pawnah thawhhona leh inlungrualna an sual em? Kohhran neitu diktak thlirdan hriat a chakawm hle mai. Krista chu Kohhran dintu leh lu a ni a, Kohhran hi a taksa a ni. Kohhran a kan tel ve a nih chuan a neitu kan ni! Hlawhfa rawih kan ni lo tih hi I hrethar leh ang u! BMCF Kohhran memberte hi Kohhran ‘member mai’ kan ni lova, a neitu kan ni! Kohhran hi kan ta a ni a, a chhiat a thata mawhphurtu kan ni. Hlawhfa rilru pu lova, neitu rilru nen a Kohhran kan enkawl a pawimawh hle mai. A chhe lai siamthatu, a tidarhtu ni lova a sengkhawmtu, a ti chhetu ni lova a tuamdamtu, a sawichhetu ni lova a chawimawitu, a ti hmingchhetu ni lova a ti hmingthatu kan nih theihna chu a neitu rilru kan put theuh hi a ni.

Johana bung 10 ah, Isua beramte chu amah ‘Beram kawngkhar’ a lutte an ni tih kan hmu a. Kohhran member leh neitu diktakte chu Beram kawngkhar atanga lutte chauh an ni a tih theih awm e. kawngkhar atanga lut lova, hmun dang atanga lut an awm ve bawk tih pawh kan hmu a ni. Isua’n a sawizelnaah, “Ruk hmang chu ru tur leh, tihlum tur leh tichhe tura lokal” an nih thu a sawi leh a, hmun dangah, “Ka lama tang lo chu, mi do a ni; tupawh mi lak khawmpui lo chuan a tidarh a ni” (Matthaia 10:30) a ti leh bawk a. Kohhran neitu diktak chuan a tidarh lova, a lak khawmpui zawk thin.

Kohhran neitu (Beram kawngkhara lut) nge kan nih a a suak (Beram kawngkhar nilo atanga lut) tih kan chian a pawimawh hmasa a, chumi hnuah beram pu dik leh diklo pawh kan thliar thiam a tul a ni. Denomination engemaw ber a kan pian avang leh kan nu leh pate Kristiana an inchhal avang ngawtin Kristian kan ni ve lo. Krista kan neih avanga Kristian kan ni. Kan lawina Kohhran chauh lo pawh Kohhran dang a tam a, Kohhran tinah hian kawngkhara lut leh lut lo an awm nawk thin. Kawngkhara lut ngei nih kan tum theuh tur a ni. Chu kawngkhara lut kan nih tawh erawh chuan a neitu kan ni a, Beram huanga beramte rawngbawlsak kawngahte, vawnhim kawngahte, chhawmdawl kawngahte, enkawl leh tihhmasawn kawngahte mawh kan phur nghal a ni tih hriain a neitu chan I chang nghal ang u. Kohhranah hian hlawhfa mai kan ni lova, a neitu diktak kan ni. Kohhran, Krista taksa chuan a lu Krista duhdanin Kohhran a enkawl mai thin a, tihluihna leh nawrluihna nena berampu inti te’n beram an hawlh fo thin hi Krista duhdan a nih a rinawm loh. BMCF Kohhran, Pathian rinawmna kum 50 hmel hmu mai turte hian thahnemngai takin, inngaitlawm takin, rinawm takin a neitu rilru pu tlat chungin kan hmalam engtak chu thlirin i pan ho zel ang u.

-Upa Josiah L. Ralte