“Kristaa awm reng,” Johana 15:4 - Rev. FC. Lalmuanpuia

Thuhma:

“Keimahah awm reng rawh u,” tia Isua Krista thusawi hian, enge min zirtir a tum? He thu atang hian Isua Krista eng angin nge kan hriat chian theih ang? Ringtu leh a rinchhan Kristaah eng inzawmna nge hre tura min duh? He Pathian Thu pawimawh lutuk hi kan Thlarau lam nun saizawinan, eng ang takin nge kan nun chhuahpui theih ang? Heng zawhna chhang thei tur hian, Lal Isua tawngkam hi kan hriatfiah a ngai hmasa a ni. A thu tobul leh a pian-ken: Thuthlung Thar mithiam-te chhuizauna hi rinrawla kan neih tur a ni a. Anni zir chianna atang a lan danin, Chanchin Tha Johana 15:1-27 hi, Lal Isua hun hnuhnung lama a thusawi a ni a. Entirna neia a thusawi te chu, zirtir ten an hriatthiam theihnan, a zingah a thu a, a hrilhfiah a. Zirtir ten a awm loh hnuah hun khirhkhan leh hun thim an paltlang dawn avangin, he thu “Keimahah awm reng rawh u, keipawh nangmahniah ka awm reng ang,” tih hi thutiam atan, Lal Isuan a zirtir-te hnenah a hrilhfiah a ni. A thu awmzia: Chanchin Tha Johana 15:1-27 thu laimu nia lang chu, Isua Krista chu Grep hrui tak a ni a. Pathian chu Grep hrui neitu a ni a. Ringtute chu Grep hrui pengte kan nih thu hi a ni. Entirna neia Grep hrui leh a pengte inzawmna hi tihian sawifiah ila; Grep hrui peng tin ten, Grep hrui neitu nen inzawmna an neih loh chuan, rah chhuah tur an nei lo va, Grep hrui neitu ber (Pathian) nen, an inzawmna a lo chat ta. Zawm nei lo peng te chu vuaiin an ro zo va, an thi ta mai thin a ni. Ringtu in nun a neih theinana, nun neitu Isua Kristaa a awm reng loh chuan, nun petu Pathianah mitthi a lo ni a, a tan dam khawkhawchuahna tur a awm tawh lo. Chuvangin, thih hnu piahlam khawvela nun kan neih theihnan; nun neitu Pathian, nun petu Isua Krista leh nung tura intlansiak mekte hi englai pawhin kan inzawm reng tur a ni. Kristaa kan awm reng chuan, keimahniah Krista a awm reng a ni. Pathian thu hriltu ropui John Knox-a chuan, ringtute kan himna tihian a sawi a, “Kristaa awm reng thin ringtu chu, hmun himah a awm reng thin a ni,” a ti. Naktuk kan hun tawn turah hian, hmun him lamah kan awm em? Naktuk naktip-a kan nun hian, hun thim tak hmachhawn dawn se, hmun himah kan awmin kan inhria em? He zawhna pawimawh tak hi kan chhang thei lo anih chuan, Kristaah kan la awm lo a ni thei ang. Kristaa kan awm loh chuan, nun tak kan la nei lo pawh a ni thei ang. Nun nei lova rawngbawltu ni lovin, nun nei tawh, Kristaa awm reng thin kan nih theihnan, tan i la sauh sauh ang u.