RAM LEH HNAM TANA TANGKAI TURA INBUATSAIH - Upa. Lawmna Kima

Kan Kohhran BMCF thiltum zinga pasarihna hi “Ram leh hnam tâna rinawm tûr leh ṭangkai tûra infuih” tih a ni. BMCF hian thiltum pawimawh tak tak a nei a, chungte chu Chanchin Ṭha hril rawngbâwlna lam hawite, Kristian nun dãn in zirtîrna lam hawite, hun puma rawngbâwl türa infuihna lamte a ni hlawm. Kum 2019 a BMCF Dãnbu ennawn a nih khan “ram leh hnam tana ṭangkai türa infuihna hi kan Kohhran thiltum pawimawh tak a ni dâwn lawm ni?” tiin kan in zawt hlawm a. Mak tak maiin dãnbu ennawntute rilru a khawih riau a, BMCF thiltum pawimawh tak zingah kan ram, Mizoram tana rinawm leh ṭangkai türa in zirtîr hi kan ngaipawimawh tur a ni tiin thutlukna kan siam ta a ni.

Martin Luther King Jr. chuan, “Kohhran chu ram kalphung ngaihventu leh veng ṭhatu a ni tür a ni” a ti. Kohhran hian kan memberte ram tana rinawm leh ṭangkai türa infuih hi kan bat leh tihmakmawh a ni. Ram tana rinawmna leh ṭangkaina dik nei türin rilru put hmang dik kan neih a ṭul hmasa a! Kan ram ah hian Kohhran in mawhphurhna pawimawh tak tak a nei a, state dangte laka kan hmel ti mawitu pawh an ni chiang. Inthlanna felfai kan nei a, tlawmngaihna leh inṭanpuitawnna kawngah entawntlak kan ni a tih theih. Chu aia pawimawh zawk hlemhletna leh eirukna dona kawngah kan pachhe em em mai hi a pawi ngawt mai. Engineer zirlaite ka fuihna ber chu, “In hlawh milin khawsa ang che u” tih hi a ni. BMCF rawngbâwlna a thusawina hun ka neih tam zawkah hian kan ṭhalaite, zirlaite zirtîrna dik chungchang hi ka sawi tam ve ta hlê in ka hria.

BMCF in Ram leh Hnam tana ṭangkai türa kan infuihna te chu hetiang hian sawifiah dâwn teh ang.

• Rinawmna leh Dikna kan sawite hi Kohhran rawngbâwlna bakah khawtlangah a lang tür a ni a, kan hnathawhna, khawsak hona leh mimal nunah a lang tür a ni. A bik takin sawrkar leh ram tana ke kan penna ah a langchhuak ngei ngei tür a ni.

• Taihmakna kan tih hi Kohhran hnatlang kal taihmak, Inkhâwm taihmak, Kohhran Committee kal taihmak ah a tawp tür a ni lova, office kal hma, ai kal lak ve ngawt loh, office hour hman dik te a kawk tür a ni.

• Kan nun dãn hian chanchinṭha a lanchhuah tir a, Lal Isua hmel ti mawi a ti mawi lo thei tu a ni tih ah a tawp tür a ni lova, kan nun dãn hian Mizo hnam nun zia hnamdangte mithmuh ah a lanchhuah tir a, kan khawsak duh dãn hian Mizo hnam a chawisangin a ti hmingchhe thei a ni tih kan hre tel tür a ni.

• Bible in “Khawvêl zawng zawngah kal ula, thilsiam zawng zawng hnênah chuan Chanchin Ṭha hi hril rawh u” a tih ang hian khawvel ram hrang hrang a mite hnenah hian Mizo nun ze mawi, kan tlawmngaihna te hi lanchhuah tir ila, kan Mizo puite chungah chauh a fel leh tlawmngaih hi a tawk lova, hnamdangte chungah “zahngaihna leh tlawmngaihna chanchin ṭha” kan puandarh hi a tul bawk a ni.

• Kohhranah taima taka thawhlawm i thawh ang hian Ram tan chhiah pek hreh lo la, Kohhran a hausa thur thur a, kan ram a rethei si hi Pathian rawng aia Kohhran (Institution) rawng kan bawl vang a ni tih a lanna a ni.

Heng thute aṭang hian BMCF in kan member zirtîrna uar zawkin pe ila kan duhna chu a chiang mai in a lang. Pathianthu hi Biak In leh a chhehvel, Pastor-te leh Kohhran Upate lanmawina atan hman tür a ni lova, nitin mimal nunah, chhungkuaah, ṭhenawm khawvengah, khawtlangah a lang anga, chumi parchhuahna tür chu kan ram hmasawnna ah a ni dâwn a ni.