Ramthim - V. Lalrobuanga (Chaplain)

“Kei zawng nun an neih nan”

Kan nunah harsatna alo thlen tak tak hi chuan vanram ngaih a zual thin, lungngaihna leh beidawnna lo thlen chang te hian he lei hrehawm chhuahsana van hmun thlen hlan i nghakhlel ve thin em? Mahse, siamtu tawk meuh tur chuan a hnen ka thlen ve hunah chuan tu hi nge ka hruaithlen ve tih zawhna hian minti hrilhhai leh thin.

Tinge Ramthim kan buaipui?

Tun September thla hi beihrual thla leh Ramthim thla a lo nih takah chuan ramthim lam i hawi ang u hmiang. “Ramthim” chu enge? kan tih chuan, ringlo mi Pathian hrelo te awmna leh chenna ti ila kan sawi sual awm lo ve. Mathaia 16:24-25, “Isuan a zirtirte hnenah chuan, “Tu pawh mi zui duh chuan mahni hrehawm pawisa lovin, a kraws puin mi zui rawh se. Tu pawh a nun humhim duh apiangin a chan ang a; tu pawh keimah avanga a nun chan apiangin a humhim ang.” Mahni indah pawimawhna sual hian Kristiante hi min ei chhe nasa tawh hle. Ringtu Pathian rawngbawl leh hnungzuitu inti si hian Self-centeredness to God- centeredness ngaihtuah miah lo hian mahni lansarh tumna te hian minva tibuai nasa ta em. Mahni indah pawimawhna dahtha a Pathian dah pawimawhna nun kan neih hian ringtu nunah chhandamna dik a thlen thin. Midangte hmangaih tur leh midangte tana nung tur kanni, hei hi kan hriat thar leh ka duh. Nitin mai hian sang tam tak Pathian neilo ten mual an liam mek, anni chhanchhuak tur chuan midang tihah leh mifate tih atan kan dah zel chu a ni si a.

Ramthim rawngbawlna hian mi thahnemngai te zarah a tha zawngin nghawng nasa tak a nei ve mek bawk a, miten Isua an neih mai bakah mihring nunphung hrim hrim hi a chawikang nasa em em a. Chhhungkaw khawsak phungah te, zirna leh thiamna chungchang thuah te tin nunphung tha zawkah a hlangkai a, chumai bakah thianghlimna thleng hian hma kan sawn phah em em a ni.

Ramthim vei a tul zia.

Thiamna sang leh sualna ten thla an zarna, ruihhlo hluar em em na khawvelah kan cheng chho mek. Chanchin thar (news) mak pui pui hriat tur lah a tam, hlauh a hnekin chhiar ti nuam tuah an chang zo ta. Kan thalai tam tak te chu Ramthim Pathian hrelo mite awmdan ang maiin kan awm ve ta mek bawk. Kan fate zirna lamah an lo inzir sang ve zela Pathian rawngbawla hlawh nei mumal lova an awm erawh kan ui a kan remti lo leh tlat thin. Ramthim a rawngbawl tur hian mi fate tih atana dah hi a lo awl a niang e. Ramthim rawngbawlna hi Lal Isua thupek a ni a Mathaia 28:19 ah chuan “kal ula, hnam tina mi zirtirahte siam ula” minti a ni, chanchin tha la hrelo hrim hrim mi sang tam tak an phut mur mur laiin kan inkuangkuah tlat dawn em ni. kristiante ringlo mite lakah kan vanneih bik zia hahipin kan sawi kan sawi a, kan bul lawkah Pathian hre lovin an boral mek bawk si.

Chatuan nunna (Johana 3:16) Pathian Mission ber kan thawh si loh chuan Kristianna hian engtin nge rah tha kan chhuah theih tehlul ang. Lal Isua’n Johana 10:10 a sawi ang khan kei zawng ringlo miten nun anneih theih nan, tam taka an neih nan rawngbawl tura inpe ka ni kanti ve thei dawn em?

In enfiah bawk ila!

Missionary leh Pathian rawngbawltu tam tak kohhran hrang hrangin kan tir chhuak ve ta nual, rah tha hmuh tur pawh a awm ve zel. Mahse, kan chhungkua aiin kan rawngbawlna kan dah lian zawk fo, kan fate kan chhungkua leh kohhranah enge an dinhmun hre reng siin mi fate kan vei a. Sunday zing inkhawm a lo hun, kan fate hnathawh vang emaw infiam(exercise) avangin, ka chau kei chu inkhawm lovin in ka lo nghak mai ang tiin kan fate an len mai mai ai chuan ngaih tha takin kan kal san thei mai zel. Chhungkua atanga rawngbawlna tan ai chuan rawngbawlna nung mite ngaihsan mite fak rawn nih kan tum ta lutuk em aw a tih theih. Mi chhungkaw zinga ring fu fu a tawngtaia chham hluah hluah thenkhat te hi mahni chenpui emaw nupui fanau te zingah chuan kan ti leh duk si, zakzeh ruk kan nei a, hengte avang hian Pathian hnung kan zuina kawngah kan nihtur ang kan nih loh phah fo thin. Ramthim veina tak tak pawh kan nei pha thin lo, engkimah Pathian zahna tello chuan khawiah mah kan huaisen thei lo kan zalen thin lo. Huaisen leh zalen taka kan awm theih nan Paulan “Intihsiakna tha chu ka bei zo tawh” atih theihna nun ang hi kan mamawh ber chu a ni mai lo maw.

“Ramthim kristian awm lohna hmun hi kan vei tak tak em, kan vei tak tak a nih chuan kan chhungkua inrelbawn dan hi hrisel hmasa sela. Engkim in tanna chu chhungkua atang a ni si a.