Zuitu Hna - F. Lalchhandama

Pathian Ram Rawngbawl hna kan thawhna ah hian Zuitu kan nihna hi hmaih palh a awl hle thin mai a; Rawngbawltura chhandam kan nihna hi Zuitu kan nihna puitlinna atana pawimawh hmasa a ni.

Zuitu hna han tih hian Pathianin rawngbawlna tura min kohna hriat leh chhan hi a bulpui innghahna pawimawh tak a ni (Mt 4:18-22; Mk 1:16-20, 2:14; Lk 5:1-11; Jn 1:32-47). Zuitu nihna (disciples) hi Chanchintha ziak leh Tirhkohte Thiltih ah te kan hmu zing hle a (TT 67, Mt 41, Mk 34, Lk 74, Jn 28), he zuitu nihna hian Lal Isua Nun leh A zirtirna zuia chhawmnung zeltu nihna a kawk lian hle a ni.

Zuitu hnaah hian kawng pawimawh tak tak Lal Isua’n a zirtirnaah neih ngei tul thil a tarlang bawk a:

Rinna: Zuitu nihna kawngah hian pawimawh taka Lal Isua pawhin a zirtir te hnenah vawi tamtak a sawi thin chu rinna nei turin a ni. Chanchintha Johana ziakah phei chuan “rinna hi nun neihna” ti hialin a ziak a ni (Jn 20:31). Johana’n he rinna a rawn tarchhuah hi rinna satliah emaw niloin, Lal Isua Krista rinna avanga Lal Isua Krista nihna tak hrechianga, thu tak a nihna zia chianga, chu thu tak avanga mi zawng zawng tana damna lo awm chu rinna tak tia tarlangin chu rinna chu nun chhuah puia, midang tan pawha chu Rinna (Lal Isua Krista) chu lan chhuah tir a duh zawk fo a ni.

Lal Isua Krista a awm reng turin: Lal Isua leh a zirtir sawmpahnih te kha ‘awm reng’ tih sawi nana hman thin an ni. Hemi awmzia chu zuitu nihna kawngah hian Lal Isua Kristaa awm reng hi rawngbawltu kan nihna anga kan tih mak mawh a ni. “Awm Reng” han tih hian Lal Isua Krista ring satliah niloin, a thu zirtir leh nun dan a zirtirte chhawm nunga midangte hnen thlentu nihna hi Johana hian a tum zawk niin a lang. Pathian chu Hmangaihna a ni angin Lal Isua pawhin hmangaihna leh ngilneihnain tu chungah pawh ro a rel ang khan, amah zuitu rawngbawl tura chhandam te hian kan mihringpuite lakah hmangaihna leh ngilneihna kan lantir ve hi zuitu hna kan thawhnaah kan tihtur pawimawh em em a ni.

Mahni Inhmangaihna anga Midang Hmangaih turin: Lal Isua khan amah zuitu a zirtirte kha anmahni leh anmahni inhlana, engmah phut let tello leh beisei telloa midang tana inpea inhlan phal turin a duh thin a; a zirtir nasa thin bawk a ni. Mahni tana tha leh tangkai leh hlawk tura kan duh a kan beih ang hian midang hlawkna tur atan hian theihtawp kan chhuah ve tur a ni tih hi Lal Isua zirtirna leh thupek thar a ni. Mahni chauh inhauvurna a zuitu nih chu Lal Isua zirtirna a nilo a ni tih hriain, zuitu diktak chuan mahni hrehawm pawisalovin midang tan engmah phut let neiloin a thawk thin zawk a ni.

Zuitu hna kan thawhna rawngbawl tura chhandam kan nihnaah hian kan engkim zawng zawng hian Lal Isua Krista kan rin a, amah a kan awm renga midangte tana inhlan phal nun kan neih hi kan tih hlawhtlin a ngai a ni. Hemi tello chuan rawngbawltu Lal Isua huat tak Temple a then faina chhan kha kan ni ang tih a hlauhawm hle a ni.